জলপাইগুড়ি,০১ এপ্রিল : দেওবার বেলা ৪ টা নাগাদ কোচবিহার জেলার মাথাভাঙ্গা ১ নং ব্লকের বালারহাট এলাকাত আচম্মিত দুন আসিয়া ছারকার করি দিছে ঘর বাড়ি, তামাউক ক্ষেত সাথতে ভুট্টা ক্ষেত।ওই এলাকার মানষি মনিরুল মিয়াঁ, রমজান আলী, আব্বাস আলী, জশন মিয়াঁ জানাইল এলাকাত মেলা বাড়িত মারাত্মক ক্ষয়ক্ষতি হইছে। মেলা মানষির রাতিত থাকিবার জাগা নাই।
যদিও প্রাণহানির কোনো খবর এলাও পাওয়া নাই যায়। আবহাওয়া দপ্তর থাকি জানা গেইসে দুই- তিন দিন থাকি কোচবিহার জেলাত বৃষ্টি বেশি হওয়ার সম্ভাবনা আছে। মঙ্গলবার এদি ওদিয়া হালকা বৃষ্টি হবার পারে কোচবিহার জেলার নানান এলাকাত।
এদিয়া শিলা বৃষ্টিত ভালে ক্ষতি হইল ক্রান্তি ব্লকের কৃষকগিলার।চেংমারী,রাজাডাঙ্গা,চৌরঙ্গী , দাশমোড়, গঙ্গাদেবী সথে মেলা এলাকাত চাষের জমিত ক্ষয়ক্ষতি হয়।
জলপাইগুড়ি জেলা প্রশাসন মারফৎ খবর জলপাইগুড়িত ক্ষতিগ্রস্ত মানষিলার খবর নিবার বাদে আজি রাতি বেলাতে বিশেষ বিমানত করি মুখ্যমন্ত্রী জলপাইগুড়ি আসি সোজা চলি যায় সেনপাড়াত মৃত বাবলু দাসের দিদির বাড়ি।
ক্ষতির মুখত পড়া মানষিলার বগলত সরকার থাকিবে কি না পুছিলে মুখ্যমন্ত্রী কন যে, এই মানষিলার সথে সৌগসময়ে থাকিবে।কিন্তুক ভোটের কারণে MCC লাগু থাকিবার কারণে মুই কিছু কহেছু না, কিন্তুক প্রশাসন উমার সথে আছে, থাকিবে।প্রশাসন খবর রাখেছে। সমায়মতো ঠিক ঠাক ব্যাবস্থা নিবে।
